For krigs og etterkrigsgenerasjonen er Peder Furubotn (1890-1975) eit kjent politikarnamn. Få har som som han vore omstridd i den politiske debatten i Norge i etterkrigstida. For unge i dag er Peder Furubotn eit ukjent namn. Men Furubotn var den einaste norske politikaren som kontinuerleg vart forfylgt av tyskarane frå 1940-45. Det at han greidde å halda seg på frifot under heile motstandskampen er ei bragd som imponerer - og som vil fascinera framtidige generasjonar. I denne boka får lesaren kjennskap til Furubotns rolle i norsk historie. Hovudvekta ligg på kampen om makta over Norges kommunistiske parti 1945-49. Var det Furubotn eller Josef Stalin som skulle styra partiet? Boka er bygd på Titlestads avhandling til dr.philos.-graden ved universitetet i Bergen. Bedømmingskommiteen skreiv at "Det er her tale om original forskning på et højt internationalt niveau..." Dette er eit standardverk om norsk kommunisme - frå ei tid då NKP på meiningsmålingar hadde opp til 15% av veljarmassen på riksplanet - i byane vel 20%. Det var under Furubotns leiing at NKP spela ei sentral rolle i norsk politikk - med to statsrådar i 1945 og 11 stortingsrepresentantar 1945-49. Tidlegare topphemmelege sovjetiske kjelder blir her for første gong tilgjengelege for norske lesarar. Torgrim Titlestad er cand.philol., historikar og førsteamanuensis ved Høgskolen i Stavanger.