Ein roman om kjærleikens krefter i menneskelivet, dei gode og dei vonde. Forteljaren lever som uteliggar i Oslo. På ein grøn benk ved Akerselva har han sin base. Han er ingen vanleg boms, men ein rappkjefta og fabulerande samtidsprofet, med fortid som hjelpepleiar. Usynlege liner snor seg gjennom dei mange historiene, frå gutungen Joakim som sel kroppen sin til vaksne menn og som forteljaren prøver å ta seg av, til Bell, kvinna som i tre år lar han oppleve den store, ustyrlege og sanselege kjærleiken. Språket til Sande er fullt av kantar, sprekkar og sår, og svingar seg frå blødmer til visdomsord, frå gatespråk til det høglitterære, frå blodig alvor til den sprøaste humor - eit språk som rører ved mange strengar hos lesaren.