I 1917 bur Marie i Elsass, som er styrt av eit brutalt militærdiktatur. Ektemannen, Martin, er flykta til Frankrike. Derimot dukkar ungdomskjærasten, Georg, opp i tysk offisersuniform.

I 1968 går Evelyn, av venner kalla Evy, på gymnaset på Voss. Farsfamilien hennar vart hardt ramma av den andre verdskrigen. På ferie i Pasvik i Finnmark og sørover i Europa kjem ho nær jernteppet, som deler kontinentet i to. I ein bokhandel i Colmar møter ho Marie si datterdatter og blir kjent med dagbøkene til E.E. Lévy frå første verdskrig.

Vi kjem tett på Marie, og dei forholda ho og dei som står henne nær på ulike måtar lever under, og både Marie og Evy reflekterer over mangt og mykje. Marie håpar på gjenforeining med det demokratiske Frankrike, mens Evy ikkje får sommarflørten med ein fransk student ut or tankane.